Monday, March 14, 2011

一個菠蘿包丫唔該

岩岩係朋友facebook見到一個唔係好掂既菠蘿包,激發我打一篇blog

註:唔係好掂意思 - 菠蘿皮細塊得滯之餘仲要燶左。

其實我唔係好鍾意食包。 係面包鋪買來買去都係果3隻:提子麥包、豬仔包、菠蘿包 間中會有腸仔包、餐蛋包…… 不過講到令我愛上既,非菠蘿包莫屬!

我爸爸係一個”breadaholic” 麻麻話幾廿年前爸爸讀中學時,明明好鬼瘦,都可以放學買成磅方包返屋企獨吞。 可能佢想將呢個「優良傳統」傳落下一代,所以我同我兩個妹小學時小息茶點都係:麵包

姐係咁,重申一下,雖然我唔鍾意食包,但係菠蘿包真係十分十分例外。 等我講下點解啦

話說我小學四至六年級係返上晝班既。 爸爸每朝都會帶我落樓等校車,我上左車之後,佢就會行去茶餐廳飲杯熱奶茶,再歎返個新鮮出爐菠蘿包菠蘿油 平時放假一家三口(未有妹妹時)/一家五口落茶餐廳食早餐,佢都會叫返件。 當然,佢亦都會叫我試下啦! 就係第一啖嚐試,我往後既十幾年人生就同菠蘿包結下不解緣。

讀中學時搬左屋,唔再搭校車,自己行返學。 每一朝如果唔係係新式面包鋪買吞拿魚治就係係舊式面包鋪買返個菠蘿包
Pre-asso時係太子返學,我諗大家都可能知啦,太子弼街有一間金X茶餐廳既菠蘿包真係超級無敵咁好味,所以成日一放break我地就成堆人操兵落去買菠蘿包(當然,間中都轉下口味行過幾條街買奶油墨西哥包)。
而家讀大學,如果起得切身搭校車又有散子的話(我成日都唔記得帶錢出街,又懶得去ATM),我會係等校車果度間面包鋪買個都算新鮮出爐既菠蘿包

屈指一算,數到手都軟,應該有千千萬萬個菠蘿包係我個口爬入肚。 就算知道塊菠蘿皮好肥好多反式脂肪,腦海都未出現過「唔好再買菠蘿包」呢個念頭 J

Read through一次呢篇文,原來我打左口語。 哈,雖然有點兒那個,不過我冇諗過轉返做書面語啵! 因為菠蘿包同港式中文一樣,都係Hong Kong culture The Magpie Bridge作者,Liu Hong一句:it has always been my own private language of freedom.

4 comments:

  1. 有牛油ge 菠蘿包比冇牛油GE 好味N倍. *.*

    ReplyDelete
  2. 我想起小學小息吃的茶點幾乎日日都是腸仔包XDDD

    ReplyDelete
  3. 腸仔包條腸仔好咸哈哈哈

    ReplyDelete